Суддзя Жлобінскага раённага суда Святлана Андрэева за два дні, 5 і 6 верасня вынесла прысуды двум ваеннаслужачым, абвінаваціўшы іх у арганізацыі і падрыхтоўцы дзеянняў, якія груба парушылі грамадскі парадак, альбо актыўным удзеле ў іх (ч. 1 арт 342 Крымінальнага кодэкса), піша праваабарончы цэнтр «Вясна».
Артур Панчанка служыў па кантракце ў вайсковай часці на пасадзе старэйшага пажарнага выратавальніка ваеннай каманды супрацьпажарнай абароны і аварыйна-выратавальных работ у Жлобіне.
Паводле матэрыялаў абвінавачання, Артур Панчанка, «дзейнічаючы сумесна і ўзгоднена ў групе асоб прыкладна з 21 гадзіны 9 жніўня да 1 гадзіны 30 хвілін 10 жніўня 2020 года, «стаяў на праезнай часткі аўтамабільнай дарогі, перашкаджаючы руху грамадскага і іншага транспарту, пляскаў ў ладкі, гучна крычаў, свістаў, выкрыкваў розныя лозунгі, пры гэтым адмаўляўся ад выканання законных патрабаванняў прадстаўнікоў улады».
У Жлобіне, як сцвяржае следства, ў дзень выбараў прэзідэнта Рэспублікі Беларусь 9 жніўня 2020 года каля 22 гадзін у раёне гарадской плошчы сабраўся агрэсіўна настроены натоўп у колькасці больш за 1000 чалавек.
Суд пастанавіў прызначыць Панчанку пакаранне ў выглядзе арышту на тэрмін тры месяцы. Тэрмін адбыцця пакарання вылічваць з дня накіравання для адбыцця арышту на гаўптвахту ваеннай камендатуры.
На другі дзень, 6 верасня, суддзя Андрэева разгледзела крымінальную справу яшчэ аднаго ваеннаслужачага — 20-гадовага Максіма Аўсяннікава.
Максім якраз праходзіць тэрміновую вайсковую службу ў вайскавой частцы ў Барысаве. Сутнасць абвінавачання аналагічная першаму суду і прысуд напісаны як пад капірку.
Прысуд таксама аднолькавы — арышт на тэрмін тры месяцы на гаўптвахце.