Украіна не бачыць сэнсу развіваць адносіны са Святланай Ціханоўскай. Пра гэта заявіў прадстаўнік Офіса Зяленскага Міхаіл Падаляк, адказваючы на пытанне Delfi, чаму ніхто з прадстаўнікоў Украіны не сустракаецца з лідаркай беларускіх дэмсілаў і ці ёсць стратэгія ва ўкраінскай улады што да Святланы Ціханоўскай і Аляксандра Лукашэнкі.
— Мы не бачым сэнсу асаблівага развіваць гэтыя адносіны, таму што не бачым выразнай антываеннай актыўнасці з боку апазіцыі. Што такое актыўнасць? Гэта нейкія маштабныя маніфестацыі, нават не ў самой Беларусі, а каля беларускіх пасольстваў іншых краін. Пра сустрэчу з Ціханоўскай, пры ўсёй павазе, а якая каштоўнасць гэтай сустрэчы? Зяленскі фармуе глабальны парадак дня, але ён не можа фармаваць лакальныя, рэгіянальныя парадкі дня ў кожнай краіне.
Падаляк лічыць, што беларускай апазіцыі самой трэба вызначыцца, хто з іх сапраўды мае ўплыў на беларускае грамадства, з такім чалавекам Украіна і будзе разглядаць магчымасць сустрэчы.
— З іншага боку, у Лукашэнкі бачым разуменне таго, як гэтая вайна развіваецца. Для яго максімальна небяспечна ў гэтай вайне браць яшчэ больш актыўны ўдзел, чым ён бярэ цяпер, — адзначыў ён.
Падаляк таксама заявіў, што не сумняваецца ў тым, што ў Пуціна былі планы захапіць краіны Балтыі, Малдову, Паўночны Казахстан.
— Можам узяць і іншыя краіны, напрыклад, Арменія, Грузія, Беларусь — яны хутчэй за ўсё вярнуліся б да канцэпцыі Савецкага Саюза 2.0. То-бок усе гэтыя дзяржавы кантраляваліся б Крамлём, а палітычны фармат іх уладкавання стаў фармальнай рэспублікай з падначаленнем маскоўскаму цэнтру. Гэта было б у выпадку, калі б Украіна пала за тры дні. Адначасова Расія змяніла б мадэль паводзінаў у Еўропе — запатрабавала б ультыматыўна яшчэ тэрыторыі, — перакананы Падаляк.
Няма пазіцыі?
Раней пра тое, што ў Святланы Ціханоўскай няма выразнай пазіцыі што да Расіі і Пуціна, у інтэрв'ю ўкраінскай службе «Радыё Свабода» гаварыў кіраўнік камітэта па замежных справах Вярхоўнай рады Аляксандр Меражко.
На думку дэпутата, «легітымным беларускім органам, з якім Кіеў мог бы весці дыялог», мог бы стаць полк Каліноўскага, які ваюе ў складзе УСУ і сваімі дзеяннямі на фронце даказаў, што «прытрымліваецца праўкраінскай пазіцыі і мае аўтарытэт сярод беларускай апазіцыі».
Сама Святлана Ціханоўская не раз выказвала падтрымку Украіне ў вайне, асуджаючы і Пуціна, і расійскую агрэсію.
У кастрычніку мінулага года яна апублікавала відэазварот да прэзідэнта Зяленскага з прапановай выбудаваць альянс з дэмакратычнай Беларуссю.
— Мы гатовыя дзейнічаць разам з Украінай. Таму што без свабоднай Украіны не можа быць свабоднай Беларусі і Еўропы. А без свабоднай Беларусі не можа быць свабоднай Украіны, — звярнулася да Зяленскага Ціханоўская.
Пазней у інтэрв'ю «Украінскай праўдзе» лідарка дэмакратычных сіл расказала, што прэзідэнт Украіны пакуль не адрэагаваў на яе публічны зварот, але яна разумее чаму.
— Калі мы гаворым пра самы высокі ўзровень, пра прэзідэнта, то Украіна займае асцярожную пазіцыю па камунікацыі з дэмакратычнымі сіламі Беларусі, бо ўсё-такі вы ў стане вайны. І любы няправільны крок, як падаецца адміністрацыі Зяленскага, можа выклікаць неабдуманыя крокі з боку Лукашэнкі. Але вайна ўсё роўна скончыцца, яна скончыцца перамогай Украіны. І цяпер, не наладжваючы кантакты з дэмакратычнай Беларуссю, такое меркаванне будзе ў беларусаў, што Украіна будзе гатовая далей супрацоўнічаць з Лукашэнкам, які такі ж агрэсар, — адзначыла яна.
Думкі пра тое, што ўкраінская ўлада робіць памылку, не наладжваючы супрацоўніцтва з дэмсіламі Беларусі, раней выказвалі тагачасны пазаштатны дарадца кіраўніка Офіса прэзідэнта Украіны Аляксей Арастовіч і былы пасол Украіны ў Беларусі, экс-прадстаўнік Украіны ў Трохбаковай кантактнай групе ў Мінску Раман Бяссмертны.
