Крэмль, расійскія вайскоўцы і спецслужбы правялі спецыяльную прапагандысцкую аперацыю з нібыта найноўшай ракетай «Арэшнік», каб адказаць Захаду на дазвол Украіне наносіць удары па Расіі дальнабойнай зброяй. Пра гэта The Moscow Times расказалі чацвёра дзейных чыноўнікаў з розных эшалонаў расійскай улады. Усе яны пагадзіліся размаўляць на ўмовах ананімнасці з прычыны спецыфікі пытання.
Паводле крыніц, у падрыхтоўцы аперацыі, мэтай якой было запалохаць заходніх палітыкаў і грамадзян, што паступова страчваюць страх перад ядзернымі пагрозамі з Масквы, бралі ўдзел крамлёўскія піяршчыкі.
«Былі мазгавыя штурмы на тэму чым адказаць і як асадзіць амерыканцаў і англічан за іх дазвол Зяленскаму выкарыстоўваць дальнабойную зброю. І як шугануць Берлін і іншых еўрапейцаў, каб было непанадна», — сказаў расійскі чыноўнік.
У выніку была распрацаваная класічная ваенная прапагандысцкая кампанія з мэтай выклікаць перабольшаныя ўяўленні пра здольнасці расійскага ваенна-прамысловага комплексу.
«У гэтым шоу, зрэжысаваным і паказаным публіцы, было некалькі этапаў. Галоўныя з іх — само нанясенне ўдару „Арэшнікам“, распаўсюд кадраў у сацыяльных сетках і замежных СМІ», — сказаў іншы расійскі чыноўнік.
Удзельнікамі шоу сталі ў тым ліку прэс-сакратар МЗС Марыя Захарава і куратар СМІ ў Крамлі Аляксей Громаў. Апошні патэлефанаваў Захаравай проста падчас брыфінгу з замежнымі журналістамі і па гучнай сувязі забараніў «каментаваць удар балістычнымі ракетамі» па вайсковым заводзе ва ўкраінскім Дняпры.
«Гэтым фокусам з нібыта званком Громава асабліва ганарыліся некаторыя ўдзельнікі мазгавых штурмаў», — сказаў расійскі чыноўнік. Ён назваў гэта і «пасхалкай» для расійскіх журналістаў, якім «добра вядомыя практыкі Аляксея Аляксеевіча [Громава]».
Кульмінацыяй кампаніі запалохвання стаў асабісты выступ Уладзіміра Пуціна з трыбуны саміту краін — чальцоў Арганізацыі Дамовы пра калектыўную бяспеку (АДКБ), дзе расійскі прэзідэнт выхваляўся характарыстыкамі ракеты, сцвярджаючы, што яна не мае аналагаў і параўнальная магутнасцю з ядзернай.
«Саміт быў прысвечаны праблемам краін-чальцоў. Аднак публічна начальнік [так расійскія чыноўнікі паміж сабой часта называюць прэзідэнта] фактычна цалкам перахапіў павестку і выкарыстаў яе для пагрозы саюзнікам Зяленскага», — сказаў чыноўнік, знаёмы з падрыхтоўкай працы саміту.
«Я падазраю, што для іншых удзельнікаў саміту, кіраўнікоў дзяржаваў АДКБ тое, пра што і ў якім рэзкім фармаце выступіць начальнік, стала сюрпрызам. Загадзя іх пра гэта не інфармавалі. А самі яны, па сутнасці, сталі гарнірам для нашай асноўнай стравы — акту псіхалагічнай вайны супраць Захаду», — дадаў чыноўнік.
Аднак праблема Масквы палягае ў тым, што Расія не мае істотнага запасу сістэм «Арэшнік», і нават асабіста Пуцін у сваёй прамове прызнаў, што ўдар па Дняпры быў выпрабавальным выкарыстаннем. Расійскай прамысловасці, улічваючы бюракратычную цяганіну і адставанне ў інавацыях, характэрныя для абароннага сектара, спатрэбяцца гады, каб выйсці на масавую вытворчасць «Арэшніка», расказаў The Moscow Times інжынер з досведам працы ў Мінабароны на ўмовах ананімнасці.
«Нават адносна простыя праекты, не звязаныя з ракетамі, могуць займаць ад пяці да сямі гадоў на распрацоўку, — дадаў інжынер. — Гэты ўдар па Украіне, відаць, стаў першым выпрабаваннем ["Арэшніка"]. Дадзеных для апраўдання запуску ў масавую вытворчасць пакуль недастаткова».
Інжынер адзначыў, што ў расійскім арсенале ўжо ёсць ракеты з характарыстыкамі, падобнымі да «Арэшніка», такія як яго базавая мадэль РС-26 «Рубеж», і дапусціў, што раптоўнае выкарыстанне эксперыментальнай зброі ў рэальным баі можа быць хутчэй спробай паўплываць на грамадскую думку, чым дэманстрацыяй новых ваенных магчымасцяў.
Чытайце таксама
