Паўднёвы захад Польшчы сышоў пад ваду. Глядзіце, што ў краіне-суседцы нарабіў цыклон «Барыс» і як людзі спраўляюцца з наступствамі

На цэнтральную і ўсходнюю частку Еўропы абрынуўся наймагутнейшы цыклон пад назвай «Барыс». Праз моцныя залевы на паўднёвым захадзе суседняй з Беларуссю Польшчы частка рэк выйшла з берагоў. Больш за ўсё пацярпелі рэгіён Ніжняй Сілезіі і Апольскае ваяводства. За ўчора з затопленых раёнаў эвакуявалі 2600 чалавек. У найбольш пацярпелым рэгіёне каля горада Клодзка эвакуявалі 1600 чалавек, а 17 000 засталіся без электрычнасці. У шэрагу гарадоў разбураныя дамбы і масты. Рух цягнікоў паміж Польшчай і Чэхіяй прыпынены. Загінула прынамсі пяць чалавек. Прэм’ер-міністр Польшчы Дональд Туск абвясціў пра падрыхтоўку да ўвядзення ў краіне рэжыму стыхійнага бедства. Зірніце, як выглядаюць наступствы стыхіі ў краіне-суседцы.