ЗША дазволілі Украіне наносіць удары сваёй зброяй па расійскіх вайсковых аб’ектах па ўсёй лініі фронту, а не толькі з боку Харкаўскай вобласці. Пра гэта паведамляе Politico.
Як піша выданне, дарадца па нацыянальнай бяспецы Джэйк Саліван заявіў, што дазвол Украіне наносіць удары па вайсковых аб’ектах Расіі на яе тэрыторыі распаўсюджваецца на «любое месца, дзе расійскія войскі перасякаюць украінскую мяжу, каб паспрабаваць захапіць дадатковую тэрыторыю».
У апошнія дні Расія дала зразумець, што неўзабаве можа пайсці на горад Сумы, які таксама знаходзіцца недалёка ад расійскай мяжы. Калі гэта адбудзецца, такая палітыка будзе выкарыстозвацца і там, заявіў Саліван.
«Рэч не ў геаграфіі. Гаворка ідзе пра здаровы сэнс. Калі Расія нападае ці збіраецца напасці са сваёй тэрыторыі на Украіну, мае сэнс дазволіць Украіне нанесці зваротны ўдар па сілах, якія наносяць удары па ёй з-за мяжы», — адзначыў прадстаўнік Белага дома.
Пры гэтым забарона біць дальнабойнай амерыканскай зброяй углыб расійскай тэрыторыі застаецца ў сіле.
Як раней адзначалі у амерыканскім Інстытуце па вывучэнні вайны, забарона на выкарыстанне амерыканскай зброі для нанясення ўдараў па расійскай тэрыторыі дазволіла арміі РФ стварыць у памежжы сапраўднае сховішча, дзе яна магла канцэнтраваць тэхніку, войскі, службы кіравання, лагістыкі і тылавога забяспечання, задзейнічаныя ў правядзенні ваенных аперацый ва Украіне, а таксама абстрэльваць украінскія тэрыторыі. Змякчэнне гэтай забароны адносна Харкаўскай вобласці, паводле ацэнак экспертаў Інстытута, скараціла гэтае «наземнае сховішча» максімум на 16%. Калі Захад дасць дазвол выкарыстоўваць перададзеную зброю для нанясення ўдараў па аператыўным і глыбокім тылах Расіі, гэта дазволіць Украіне зрываць маштабныя расійскія аперацыі, лічаць у ISW.
