Студэнты Полацкага дзяржаўнага ўніверсітэта (ПДУ) незадаволеныя: іх высяляюць з інтэрнатаў. Адпаведныя ўлёткі з заклікам SOS з’явіліся ў маршрутцы Наваполацка — менавіта ў гэтым горадзе размешчаныя многія карпусы ўніверсітэта. Расказваем падрабязнасці.
У чым рэч
Фота надрукаваных улётак з напісанымі ад рукі чырвонымі літарамі SOS у рэдакцыю даслаў чытач, паведаміўшы, што ўбачыў іх у маршрутцы ў Наваполацку.
Тое, што адбываецца ва ўніверсітэце, у тэксце апісваецца як «трэш у ПДУ». Ва ўлётцы гаворыцца, што ВНУ «высяляе сотні беларускіх студэнтаў з родных інтэрнатаў, якія былі заробленыя ўпартым навучаннем і адэкватнымі паводзінамі». Прычына — «замежныя студэнты з Туркменістана, Узбекістана, Афрыкі».
— Усё проста! Нас мяняюць на «бабкі», якія вязуць замежнікі! А мы не патрэбныя ўніверсітэту! — лічаць аўтары тэксту. І, звяртаючыся да Аксаны Валер’еўны Голубевай (першая прарэктарка ўніверсітэта), заяўляюць, што не будуць слухаць яе ўгаворы, «добраахвотна саступіць нашыя законныя месцы замежнікам».
Высяляюць студэнтаў, як высвятляецца з той жа ўлёткі, у інтэрнат прадпрыемства «Полацк-Шкловалакно». Але, як сцвярджаецца, там «няма святла і электрычнасці, у хлам раздзяўбаныя пакоі, суседзі — алкаголікі са стажам». Яшчэ адзін варыянт падменнага жылля — інтэрнат Полацкага дзяржаўнага ляснога каледжа, але і ён не нашмат лепшы.
— У 22.00 адбой (а нам яшчэ трэба 3−5 гадзін на падрыхтоўку да заняткаў), інтэрнэту няма ад слова «зусім», душ у падвале. Затое ёсць клапы і прусакі ў неабмежаванай колькасці! Вельмі годныя месцы для пражывання студэнтаў, у якіх сярэдні бал 9,0 і вышэйшы!
У канцы ўлёткі яе аўтары абяцаюць «разам з бацькамі змагацца ўсімі даступнымі сродкамі». Якімі менавіта — не ўдакладняецца.
Што кажуць ва ўніверсітэце
Як жыхарка Наваполацка, якая ўбачыла такую ўлётку ў маршрутцы, нашая журналістка патэлефанавала ў рэктарат ПДУ. На пытанне, што ўсё ж адбываецца, у прыёмным пакоі адказалі каротка:
— Ну, вы ведаеце, [у людзей] рэакцыя розная на нейкія перамены ў жыцці. Не ведаю, некаму нешта не падабаецца, і вось яны вырашылі такім чынам [адрэагаваць], — сказала супрацоўніца прыёмнага пакоя рэктара.
Адказваць на далейшыя пытанні праз тэлефон там адмовіліся. Пасля невялікай паўзы суразмоўніца прапанавала прыйсці на прыём да прарэктара, каб асабіста атрымаць усе адказы.
Журналістка «Люстэрка» таксама патэлефанавала ў інтэрнат прадпрыемства «Полацк-Шкловалакно» з пытаннем, чаму студэнтаў перасяляюць у інтэрнат для супрацоўнікаў, асабліва ўлічваючы ўмовы, якія апісваюцца ва ўлётцы.
— У нас студэнты пражываюць, але не ў тых умовах, якія былі апісаныя і паказаныя, — пацвердзіла супрацоўніца інтэрната факт перасялення і паклала слухаўку.
Чытайце таксама
