Некалькі месяцаў таму ў TikTok завірусіўся ролік: жыхарка сталіцы ў агрэсіўнай форме выказвае свае прэтэнзіі супрацоўніцы крамы вядомай гандлёвай сеткі, якая нібыта незаконна дагледзела сумкі дваіх яе дзяцей на выхадзе з гандлёвай залы. Гісторыя мела нечаканы працяг, піша агенцтва «Мінск-Навіны».
Як расказала загадчыца гандлёвага пункта Таццяна, у той вечар па пакупкі ў краму прыйшлі дзеці, якія сваімі паводзінамі адразу ж выклікалі падазрэнне.
— Яны бралі тавар у рукі, потым — стваралася такое ўражанне, што кладуць яго ў торбачку, потым дастаюць і вяртаюць на месца, — патлумачыла яна. — Пры гэтым абое дзяцей азіраліся па баках. Гэта тыповыя паводзіны дзяцей, якія плануюць нешта скрасці.
Сваімі дзеяннямі яны забралі ўвагу жанчыны, і, калі дзеці ўжо збіраліся пакінуць краму, яна ветліва папрасіла хлопчыка адкрыць сумку і паказаць змесціва. Потым выбачылася і развіталася з хлопцамі.
— Праз дзесяць хвілін прыбеглі бацькі, пачалі крычаць. Маці адразу дастала тэлефон і пачала здымаць, хоць я сказала, што не даю згоды на здымку, — успомніла суразмоўніца.
Пасля маці дваіх дзяцей размясціла відэа ў TikTok, а таксама пакінула запіс у кнізе скаргаў і прапановаў. Адказ з боку крамы на скаргу натхніў яе на стварэнне новага відэа.
— Многія карыстальнікі сацсеткі адзначылі, што няма нічога кепскага ў тым, што супрацоўнікі крамы папрасілі паказаць змесціва сумкі, — кажа загадчыца. — Відэа набрала велізарную колькасць праглядаў. Убачылі яго калегі, кіраўніцтва, партнёры. Пастаянныя наведнікі прыходзілі і падтрымлівалі. Усе цікавіліся ходам развіцця падзей.
Тым часам мама дзяцей завяла яшчэ адну старонку, якую прысвяціла непасрэдна сітуацыі ў краме, дзе размясціла ўсе відэа па гэтым пытанні. Пасля гэтага загадчыца крамы звярнулася ў Нацыянальны цэнтр абароны персанальных звестак, дзе ёй рэкамендавалі напісаць заяву ў міліцыю — паводле арт. 23.7 КаАП (Парушэнне заканадаўства пра абарону персанальных звестак).
— Пасля таго як я падала заяву, жанчыну выклікаў участковы, правёў з ёю гутарку. Яна выдаліла ўсе тыя відэа, — расказала загадчыца гандлёвага пункта. — Таксама я падала заяву ў суд. Дарэчы, сама маці тых дзяцей не прыйшла ні на адно паседжанне — замест яе прысутнічаў адвакат.
Суд выйграла загадчыца крамы, якой прызначылі кампенсацыю маральнай шкоды і выдаткаў на падачу пазову. Хоць галоўнай мэтай, прызнаецца Таццяна, было выдаленне ўсіх відэа з сеціва, у тым ліку тых, якія распаўсюдзіліся на іншых платформах дзякуючы рэпостам.