У Магілёве дзве жанчыны ездзілі на матацыклах у майках з надпісам «Мілфіцыя». Жарт, які павесяліў карыстальнікаў сацсетак, у міліцыі не ацанілі. На жанчын склалі чатыры пратаколы. Пра гэта паведаміў неафіцыйны тэлеграм-канал МУС.
Як паведаміў прапагандысцкі рэсурс, пасля таго як здымкі байкерак разышліся ў сеціве, «супрацоўнікі ДАІ імгненна высветлілі» асобы матацыклістак. Імі аказаліся 39 і 41-гадовая жыхаркі Магілёва.
«У дачыненні да іх складзеныя чатыры адміністрацыйкі, а двухкольнікі забраныя», — расказаў неафіцыйны тэлеграм-канал МУС.
Прапагандысты таксама ўдакладнілі, што адна з байкерак раней прыцягвалася да адказнасці за парушэнне хуткаснага рэжыму, другая «больш за 60 разоў парушыла ПДР» і раней пазбаўлялася права кіравання.
Неафіцыйны канал МУС апублікаваў «пакаяльнае» відэа жанчын.
— Мы мотааматары, актыўна здымаем TikTok у гумарыстычным плане. Неяк у краме ўбачылі майкі і вырашылі купіць, — прымусілі сказаць на камеру адну з іх.
Дарэчы, майкі «Мілфіцыя» дагэтуль можна купіць на Wildberries. Цана — 672 расійскія рублі (амаль 24 беларускія).
Слова «мілфа» паходзіць ад англійскай абрэвіятуры MILF. Як піша Кембрыджскі слоўнік, першапачаткова так у моладзевым асяроддзі называлі «сэксуальна прывабную жанчыну-маці». Пазней значэнне тэрміна пашырылі, прыбраўшы з яго ўдакладненне пра наяўнасць дзяцей.