Беларус прадаў кватэру ў Мінску на падставе даверанасці ад уласніка, які памёр за некалькі дзён да гэтага. Суд прызнаў угоду нікчэмнай, паведамілі ў пракуратуры.
У снежні 2023 года беларус на падставе даверанасці прадаў у Мінску кватэру, уласнік якой памёр за некалькі дзён да гэтага. Прадавец ведаў пра гэта, афармляючы ўгоду, — гэта было дакладна ўстаноўлена пачдас праверкі.
Першапачаткова кватэра была аддадзеная ўласніку дзяржавай як сіраце і была ім прыватызаваная. Да сваёй смерці мужчына жыў адзін, стаяў на ўліку ў псіхіятра.
Акрамя таго, пакупніком жылля аказалася абмежавана дзеяздольная пенсіянерка — яна расказала, што якіх-кольвек грошай па дамове куплі-продажу нікому не перадавала, а ўгоду заключыла на просьбу раней знаёмай ёй даверанай асобы.
Пракуратура Ленінскага раёна Мінска ў інтарэсах раённай адміністрацыі звярнулася ў суд з пазовам пра прызнанне несапраўднай дамовы куплі-продажу жылля.
Суд цалкам задаволіў заяву пракурора: угода прызнаная нікчэмнай, а дзяржаўная рэгістрацыя дамовы і пераходу права ўласнасці ў дачыненні да кватэры — несапраўднымі. І з прадаўца, і з пакупніка спагналі дзяржпошліну. Рашэнне суда ўступіла ў законную сілу.
Сваякі, якія маглі б прэтэндаваць на кватэру ў парадку атрымання ў спадчыну, падчас праверкі пракуратуры і судовага разбіральніцтва не знайшліся. Калі яны не аб’явяцца і не ўступяць у спадчыну, кватэра пяройдзе ва ўласнасць дзяржавы як вымарачная спадчына.
