У рабстве на ферме ў Свярдлоўскай вобласці 33-гадовы беларус прабыў амаль год. Вызваліць яго ўдалося дзякуючы актывістам руху «Альтэрнатыва», на гэта звярнула ўвагу выданне Reform.by.
33-гадовы грамадзянін Беларусі Вадзім Жалезкі звярнуўся па дапамогу ў «Альтэрнатыву» (гэта арганізацыя, якая змагаецца з сучасным рабствам) некалькі дзён таму. Ён расказаў, што на запрашэнне швагра прыехаў на заробкі ў Расію ў траўні 2023 года. Паводле дамоўленасці Вадзім мусіў працаваць на пілараме з заработнай платай 25 тысяч расійскіх рублёў. Аднак насамрэч яго прывезлі на ферму ў пасёлку Шадрыха ў Свярдлоўскай вобласці РФ. Яго працай стаў догляд кароваў і дапамога па гаспадарцы. За 10 месяцаў працы заробку мужчыну не заплацілі ні разу. А за аднойчы згубленую карову Вадзіма жорстка збілі.
Вызваляць беларуса на ферму прыехалі супрацоўнік «Альтэрнатывы», валанцёры і журналісты. Яны выклікалі паліцыю.
«Далей разгарнуліся разбіральніцтвы, якія так падобныя ад выпадку да выпадку. Гаспадар фермы, мужчына на імя Навер, сцвярджаў, што дакументы ў Вадзіма не адбіраў, а потым яны цудоўным чынам былі знойдзеныя і вернутыя іх законнаму ўладальніку. Выплачваць заробак Навер таксама не спяшаўся. Пасля ўгавораў супрацоўнікаў паліцыі палічыць, колькі ж Вадзім зарабіў за амаль год працы, Навер зрабіў разлікі, пасля якіх аказалася, што ніколькі. Бо, як сцвярджаў гаспадар фермы, частку абяцанай зарплаты ён пералічваў былой жонцы Вадзіма ў кошт аліментаў, а астатняе пайшло на забяспечанне яго прадуктамі харчавання і неабходнымі рэчамі, таму Вадзім практычна яшчэ і застаўся даўжніком. Аднак трэба адзначыць, што на білет дадому грошы яму далі. Бо, паводле версіі Навера і запрошанай ім дзяўчыны-юрыста, Вадзіма ніхто там сілком не трымаў», — пераказвае разбіральніцтвы прэс-служба «Альтэрнатывы».
На ферме, паводле словаў беларуса, знаходзіліся і іншыя рабы, у тым ліку нядаўна збіты мужчына на імя Субхон.
«Мы звярнуліся з гэтай інфармацыяй да супрацоўнікаў паліцыі. Аднак вынікам былі здзіўленыя — усярэдзіну на пошукі Субхона нікога не пусцілі, а пасля самастойнай праверкі супрацоўнікі заявілі, што ўсе работнікі там рускія і нікога з сіняком пад вокам яны не знайшлі», — паведамляе «Альтэрнатыва».
Цяпер грамадзянін Беларусі ў бяспецы і найбліжэйшым часам зможа вярнуцца дадому. Дарэчы, сёння ў Вадзіма дзень нараджэння.