Кавалерыйскі рынак у Беластоку — адзін з найбуйнейшых у паўночна-ўсходняй Польшчы. Доўгі час значную частку яго наведнікаў складалі беларусы, якія прыязджалі «на закупы». Але з закрыццём мяжы колькасць пакупнікоў знізілася, паведамляе выданне MOST.
Адзіны дзейны памежны пераход для пасажырскага транспарту на беларуска-польскай мяжы знаходзіцца з боку Брэсцкай вобласці. Адтуль ехаць у Беласток па пакупкі немэтазгодна.
Паводле інфармацыі Bialystokonline, дарадцы партыі «Права і справядлівасць» прапануюць рэалізаваць тут праект паводле прынцыпу «спраектуй і пабудуй» інвестыцыйным коштам 2,855 млн злотых (амаль 670 тысяч даляраў). Праект прадугледжвае стварэнне на Кавалерыйскім рынку гандлёвых месцаў на ўзор аб’екта на вуліцы Андэрса — там працуе буйны фермерскі рынак.
Рэалізаваць праект плануецца за кошт часткі бюджэту мясцовага самакіравання, якая вылучаецца на ініцыятывы і інвестпраекты, прадстаўленыя мясцовай супольнасцю.