Мінскі абласны суд 5 ліпеня абвясціў прысуд палітвязню Эдуарду Бабарыку, піша праваабарончы цэнтр «Вясна».
Бабарыку прызналі вінаватым па трох артыкулах: ухіленне ад выплаты падаткаў, якое пацягнула нанясенне шкоды ў буйным памеры, дапамаганне ў групавых дзеяннях, якія груба парушаюць грамадскі парадак, і дапамаганне ў арганізацыі наўмысных дзеянняў, скіраваных на распальванне варожасці па прыкмеце сацыяльнай прыналежнасці. Яму прызначылі 8 гадоў калоніі ўзмоцненага рэжыму — пракурор прасіў на два гады больш.
Яму таксама прызначылі штраф — 185 тысяч рублёў.
Сваёй віны Эдуард не прызнаў.
«Я не здзяйсняў ніводнага са злачынстваў, у якіх мяне абвінавачваюць. Следствам не было знойдзена ніводнага доказу маёй віны», — сказаў ён раней у судзе.
Эдуарда Бабарыка — сузаснавальнік ужо няісных краўдфандынгавых платформаў «Вулей» і MolaMola. У траўні 2020 года ён узначаліў перадвыбарчую кампанію свайго бацькі, Віктара Бабарыкі. Іх затрымалі 18 чэрвеня таго ж года. Эдуард знаходзіцца за кратамі больш за тры гады.
Раней бок абароны хадайнічаў пра выклік у суд у якасці сведкі бацькі абвінавачанага — Віктара Бабарыкі, пра стан здароўя якога няма ніякіх вестак больш за 60 дзён. Суд задаволіў гэтую просьбу, але невядома, ці выступіў палітвязень па справе сына.
Чытайце таксама
