Палітзняволенаму Сяргею Ціханоўскаму, які ўжо адбывае 18-гадовае зняволенне, выставілі новае абвінавачанне ў «здзяйсненні злачынства супраць правасуддзя», паведамляе Следчы камітэт. Санкцыя артыкула прадугледжвае да двух гадоў пазбаўлення волі.
Як заявілі ў ведамстве, Ціханоўскі, знаходзячыся на турэмным рэжыме, нібыта парушаў парадак адбыцця пакарання, не рэагаваў на законныя патрабаванні супрацоўнікаў адміністрацыі, грубіў ім, правакаваў сукамернікаў на канфлікты.
За гэта ён неаднаразова падвяргаўся спагнанням.
Сяргея Ціханоўскага абвінавацілі па ч. 2 арт. 411 КК (Злоснае непадпарадкаванне патрабаванням адміністрацыі папраўчай установы, якая выконвае пакаранне ў выглядзе пазбаўлення волі, здзейсненае асобай, асуджанай за цяжкае і асабліва цяжкае злачынства). Санкцыя артыкула прадугледжвае да двух гадоў пазбаўлення волі.
Нагадаем, у снежні 2021 года Сяргея Ціханоўскага ўжо прызналі вінаватым па ч. 1 арт. 293 (Арганізацыя масавых беспарадкаў), ч.3 арт. 130 (Распальванне сацыяльнай варожасці), ч. 2 арт. 191 (Перашкаджанне працы ЦВК), ч. 1 арт. 342 (Арганізацыя дзеянняў, якія груба парушаюць грамадскі парадак). Яму прызначылі 18 гадоў калоніі ўзмоцненага рэжыму. У ліпені Ціханоўскі быў этапаваны ў калонію № 15 у Магілёве.
Напярэдадні ў Гомельскім аблвыканкаме паведамілі, што маёмасць Ціханоўскага часткова пушчанае ў даход дзяржавы — гаворка ў тым ліку пра «знойдзеныя за канапай на лецішчы» 900 тысяч даляраў. Той жа лёс мусіць спасцігнуць маёмасць Ціханоўскага на суму 35 тысяч рублёў, арыштаваную падчас следства, і рэчы ў яго кватэры на суму 3 тысячы рублёў. На саму кватэру ў Мінску таксама накладзены арышт.