Для падачы дакументаў на атрыманне візы трэба будзе прайсці анлайн-верыфікацыю па асабістым ідэнтыфікацыйным нумары ў Міжбанкаўскай сістэме ідэнтыфікацыі. Пра новыя правілы запісу на падачу дакументаў 21 лістапада расказалі ў кампаніі VFS Global.
Змены пачнуць дзейнічаць з 28 лістапада. Працэс запісу з мэтай падачы дакументаў на візу будзе падзелены на тры этапы:
- усім беларусам, старэйшым за 18 гадоў, трэба будзе прайсці анлайн-верыфікацыю па асабістым ідэнтыфікацыйным нумары ў Міжбанкаўскай сістэме ідэнтыфікацыі (МСІ);
МСІ — гэта сістэма, якая выкарыстоўваецца для дыстанцыйнай ідэнтыфікацыі кліентаў без іх асабістай прысутнасці і аказання ім паслуг з дапамогай лічбавых каналаў абслугоўвання. МСІ дазваляе, аднойчы прайшоўшы працэдуру асабістай ідэнтыфікацыі ў адным з банкаў, атрымліваць абслугоўванне з дапамогай лічбавых каналаў банкаў і іншых удзельнікаў фінансавага рынку Беларусі ў зручны для кліента час.
- потым неабходна будзе запісацца на падачу дакументаў на сайце VFS;
- на пошту мусіць прыйсці ліст, які пацвярджае дату і час падачы дакументаў.
Грамадзяне іншых краін, асобы, старэйшыя за 60 гадоў, законныя прадстаўнікі асобаў да 18 гадоў могуць падаць заяўку для рэгістрацыі праз электронную пошту:
- Для запісу на падачу дакументаў у Мінску, Гомелі ці Магілёве: info. [email protected];
- Для запісу на падачу дакументаў у Гродне або Лідзе: info. [email protected];
- Для запісу на падачу дакументаў у Брэсце, Пінску або Баранавічах: info. [email protected].
У візавым цэнтры звярнулі ўвагу на тое, што для паспяховага праходжання працэдуры запісу заяўку праз пошту трэба даслаць з асабістай электроннай пошты заяўніка, для няпоўнагадовых — з электроннай пошты аднаго з бацькоў, які плануе падаваць дакументы за дзіця.