У Беларусі захоўваецца некалькі нявырашаных пытанняў з заробкамі, заяўляюць у Федэрацыі прафсаюзаў. Адно з іх датычыць нясвоечасовай выдачы грошай, а другое — выплат бюджэтнікам. Таксама ёсць нявырашанае пытанне з пенсіямі.
«Яшчэ застаюцца пэўныя пытанні па зарплаце бюджэтнікаў. За мінулы год яна павысілася на 17,4%, — паведаміла намесніца старшыні Федэрацыі прафсаюзаў Таццяна Філімонава. — Аднак закладзены ў Генеральным пагадненні (паміж урадам, наймальнікамі і прафсаюзамі. — Заўв. рэд.) узровень суадносін з сярэднім заробкам па краіне пакуль у поўным аб’ёме не дасягнуты».
Як паведамляюць прафсаюзы, у студзені — снежні мінулага года заробкі бюджэтнікаў склалі 76,7% ад сярэдняй па краіне. Пры гэтым генпагадненнем паказчык закладзены на ўзроўні 80%. Узяць гэтую планку не ўдаецца не першы год.
Якая праблема ёсць з пенсіямі
«Ёсць пытанні і па суадносінах сярэдняй пенсіі па ўзросце з сярэднім заробкам», — дадаюць у Федэрацыі прафсаюзаў. Нагадаем, чыноўнікі не першы год хочуць, каб пенсіі былі на ўзроўні 40% ад сярэдняга заробку па краіне. Хоць пакуль яго дасягнуць не ўдаецца. Напрыклад, у снежні мінулага года гэты паказчык быў 31,6% (сярэдняя пенсія пенсіянера, які не працуе, — 852 рублі, а зарплата — 2693,9 рубля).
Што з пазычанасцю па заробках
Занепакоенасць у афіцыйных прафсаюзаў таксама выклікаюць «яшчэ выпадкі нясвоечасовай выплаты заробку».
«За мінулы год прафсаюзы выявілі 269 фактаў невыканання тэрмінаў разліку з работнікамі. У параўнанні з мінулымі гадамі статыстыка, безумоўна, палепшылася, прычым значна. Аднак пытанне застаецца на кантролі», — заявілі ў Федэрацыі прафсаюзаў.
Чытайце таксама
