Аператыўна-аналітычны цэнтр пры Лукашэнку забраў у Беларускай асацыяцыі журналістаў даменнае імя Baj.by. Арганізацыя лічыць гэта грубым парушэннем права на ўласнасць і чарговым ціскам на свабоду слова. БАЖ звяртаецца ў міжнародную карпарацыю па кіраванні даменнымі імёнамі ICANN, паведамілі ў арганізацыі.
Аператыўна-аналітычны цэнтр 3 студзеня прыпыніў дэлегаванне даменнага імя Baj.by яго ўласніку — нібыта ў сувязі з выяўленымі парушэннямі. Цяпер пасля адкрыцця сайта з’яўляецца заглушка, што доступ да рэсурсу абмежаваны.
Раней ААЦ праз кампанію-рэгістратар «Адкрыты кантакт» даслаў уладальніку дамена, намесніку старшыні БАЖ Алегу Агееву, паведамленне пра неабходнасць падаць дакументы з пацверджаннем дакладнасці асабістых звестак.
Актыўныя дзеянні ўладаў у гэтым кірунку пачаліся адразу пасля апублікавання БАЖ пазіцыі адносна правядзення ў Мінску рэгіянальнага форуму па кіраванні інтэрнэтам, лічаць у арганізацыі.
«Адкрыты кантакт» спачатку прапанаваў уладальніку дамена даслаць скан пашпарта на электронную пошту, але праз некалькі дзён паведаміў, што ААЦ настойвае на асабістым візіце ў офіс. Агееў у адказ праінфармаваў «Адкрыты кантакт» пра тое, што інструкцыя пра парадак рэгістрацыі даменных імёнаў у сетцы Інтэрнэт не прадугледжвае «асабістых візітаў» у офіс рэгістратара (даменамі ў зоне .by могуць валодаць, напрыклад, замежнікі), а ўсе запатрабаваныя рэгістратарам дакументы былі пададзеныя.
Нягледзячы на гэта, ААЦ прыняў рашэнне пазбавіць БАЖ беларускага даменнага імені.
Цяпер БАЖ страціў магчымасць кантраляваць сайт Baj.by і любыя электронныя скрыні ў дамене @baj.by. Невядома, як улады будуць выкарыстоўваць іх далей, таму БАЖ просіць не заходзіць на стары сайт, не пісаць і не адказваць на любыя электронныя паведамленні з электронных скрыняў @baj.by. Яшчэ з траўня 2023 года арганізацыя пераехала на новы міжнародны дамен Baj.media.
«У пазбаўленні даменнага імені мы бачым не што іншае, як рабаванне. Акрамя абуральнага факту парушэння права на свабоду выказвання беларускія ўлады парушылі яшчэ адно фундаментальнае права — на ўласнасць», — адзначылі ў БАЖ.
«Захопніцкія дзеянні ўладаў парушаюць сусветныя правілы адміністравання даменаў, таму БАЖ праінфармуе ICANN — міжнародную карпарацыю кіравання даменнымі імёнамі — і будзе разлічваць на адпаведную ацэнку інцыдэнту на сусветным узроўні», — паведамілі ў арганізацыі.
Гэта не першы выпадак даменнага рэйдарства з боку дзяржавы ў дачыненні да незалежных медыя, падкрэслілі ў БАЖ. Там лічаць, што байнэт дыскрэдытаваны і небяспечны не толькі для незалежных медыя, але і для любога бізнесу, які можа стаць наступным.
Нагадаем, у канцы 2023 года ААЦ ануляваў запіс пра рэгістрацыю даменных імёнаў — у тым ліку і TUT.BY, якія належаць яго законнаму ўладальніку. Цяпер яны не належаць Яўгеніі Чарняўскай, дачцэ заснавальніка медыя Юрыя Зісера. Чарняўскай таксама загадвалі асабіста прыйсці ў офіс рэгістратара для зверкі персанальных звестак.
Чытайце таксама
