Вядомая сетка дыскаўнтараў «Остров чистоты и вкуса» адчувае фінансавыя цяжкасці, і ёй можа пагражаць банкруцтва, пра гэта напярэдадні расказала выданне «Наша Ніва». «Люстэрка» паглядзела фінансавы стан групы кампаній, якой належыць гэтая гандлёвая сетка.
Каму належыць дыскаўнтар бытавой хіміі і касметыкі
Гандлёвай сеткай «Остров чистоты и вкуса» кіруюць тры юрыдычныя асобы: «ЗападХимТорг», «ЗападХимСервис», «ЗападХимИнвест». Усе яны ўваходзяць у групу кампаній «Ромакс». Уладальнік першай з іх і самай буйной — Іосіф Рамук — імаверна, бацька вядомага бізнесоўца Віктара Рамука. Разам «Остров чистоты» і «Остров чистоты и вкуса» налічваюць 626 гандлёвых аб’ектаў. Яшчэ 29 гандлёвых пунктаў уваходзяць у сетку алкамаркетаў «Три лося», якімі кіруюць гэтыя бізнесы.
Група кампаній «Ромакс» уключае і шэраг іншых фірмаў, сярод якіх — вытворца бытавой хіміі, парфумерна-касметычнай прадукцыі, туалетнай паперы, сурвэтак і імпарцёр падобнай замежнай прадукцыі. Належыць бізнес сям'і Віктара Рамука.
Цяжкасці пачаліся пасля ўвядзення абмежаванняў і арышту ўладальнікаў
У верасні мінулага года сілавікі затрымалі мужа і жонку Віктара і Аксану Рамукоў. У офісе кампаніі прайшлі ператрусы. У выніку ДФР выявіў «нязначныя парушэнні ў цяперашняй аператыўнай дзейнасці службовых асоб рытэйлера», паведамляла tochka.by
Паводле інфармацыі «Нашай Нівы», з СІЗА бізнесоўца выпусцілі пасля таго, як ён пагадзіўся выплаціць налічаныя штрафы на суму 7 млн даляраў. Выданне паведаміла, што накладзеныя штрафы пахіснулі і без таго нестабільную фінансавую сітуацыю ў кампаніі, — мяркуюць суразмоўцы выдання, якія прадракаюць «Ромаксу», «калі не здарыцца цуду, банкруцтва ў перспектыве шасці месяцаў».
У снежні мінулага года стала вядома, што кампанія выплаціла прызначаныя штрафы, а «ўласнікам пагашаныя ўсе фінансавыя прэтэнзіі».
Былі і іншыя значныя падзеі, якія маглі паўплываць на фінансавы стан бізнесу. Прыкладна за месяц да ператрусаў група кампаній паглынула частку рынку сеткі фармацэўтыкі — ёй перайшлі аптэкі кампаніі «Белфарм». А да гэтага гандлёвую сетку аштрафаваў МАРГ — за завышэнне цэн на дзіцячае харчаванне.
Як там з фінансамі
Летась выручка ад рэалізацыі прадукцыі «ЗападХимТорг» вырасла на 2,8% — да 588 млн рублёў. Чысты прыбытак склаў 158 тысяч рублёў. Падатку на прыбытак у 2022 годзе фірма заплаціла больш на 112,9% больш, а менавіта 728 тысяч рублёў. Усяго на аплату падаткаў і збораў фірма накіравала 26,9 млн рублёў (на 60% больш, чым у 2021 годзе).
Улетку і ў пачатку восені гэтага года ў дачыненні да гэтай фірмы заводзілі шэраг загадных вытворчасцяў. Аднак сумы даўгоў па іх, як правіла, невялікія — да 43 тысяч рублёў, вынікае са звестак, апублікаваных на сайце Вярхоўнага суда.
Невялікія сумы патрабуюць контрагенты праз суд таксама ў «ЗападХимСервис» і «ЗападХимИнвест».
Нашмат істотнейшыя сумы даўгоў праз суд патрабуюць контрагенты ў іншай фірмы гэтай групы — «Гандлёвай кампаніі Ромакс», уласнікам якой пазначаны Леанід Нехвядовіч (да лютага 2022 года ім была Таццяна Рамук). Так, у верасні была распачатая загадная вытворчасць па звароце «Лиско-плюс» на суму больш чым 87 тысяч рублёў. Распачатая справа па звароце Мінскага завода пеністых вінаў, якому кампанія завінавацілася амаль 132 тысячы і 429 тысяч. Кампанія «Тадеум» патрабуе праз суд 154 тысячы, а «Малиновщизненский спиртоводочный завод „Аквадив“» — 164 тысячы. Усяго ж за апошнія месяцы (з чэрвеня гэтага года) распачата крымінальных вытворчасцяў, у якіх даўжніком выступае гэтая фірма, на суму больш за 1,174 млн рублёў.
Акрамя таго, у гэтай аптовай фірмы ў ліпені і верасні гэтага года ўтварылася пазычанасць перад бюджэтам. Раней такая праблема ў фірмы была толькі аднойчы — у верасні 2018 года.
Чытайце таксама
