Аляксандр Лукашэнка 29 жніўня падпісаў указ пра меры супрацьдзеяння несанкцыянаваным плацежным аперацыям. Дзякуючы гэтаму дакументу, які мусіць запрацаваць праз паўгода — да 1 сакавіка 2024-га, сілавікі атрымаюць супердоступ да інфармацыі пра плацяжы беларусаў. Чыноўнікі аргументуюць новаўвядзенне барацьбой з ашуканцамі.
Згодна з указам Аляксандра Лукашэнкі, Нацбанк мусіць цягам шасці месяцаў стварыць аўтаматызаваную сістэму апрацоўкі інцыдэнтаў (АСАІ). У яе будуць уключаць інфармацыю пра несанкцыянаваныя плацежныя аперацыі і спробы іх ажыццяўлення. Пры гэтым Нацбанк яшчэ мусіць вызначыць, якую канкрэтна інфармацыю пастаўшчыкі плацежных паслуг (гэта ў тым ліку банкі) будуць перадаваць у АСАІ. Аднак ужо цяпер вядома, што гэта будуць звесткі, якія ўяўляюць сабой банкаўскую таямніцу. Сярод іншага гэта можа быць, як прапісана ва ўказе, інфармацыя пра несанкцыянаваныя пераводы (у тым ліку электронных грошай) і падазроныя плацяжы.
Сярод сілавікоў, якія атрымаюць доступ да АСАІ, ёсць органы пракуратуры,
дзяржбяспекі, унутраных справаў, Следчы камітэт і Аператыўна-аналітычны цэнтр пры прэзідэнце Беларусі.
Пры гэтым на рашэнне Генпракуратуры, КДК, СК і МУС змогуць прыпыняць на тэрмін да 10 сутак расходныя аперацыі па банкаўскім рахунку, укладзе, электронным кашальку, калі ў праваахоўнікаў будуць звесткі або толькі падазрэнні «пра здзяйсненне супрацьпраўных дзеянняў». Прасцей кажучы, нават калі сілавікам падасца, што па рахунку маглі быць здзейсненыя «супрацьпраўныя дзеянні», яны змогуць яго заблакаваць на тэрмін да 10 дзён.
«Перадача інфармацыі пра інцыдэнты з АСАІ праваахоўным органам і пастаўшчыкам плацежных паслуг не з’яўляецца парушэннем банкаўскай таямніцы. Апрацоўка
персанальных звестак, якія змяшчаюцца ў інфармацыі пра інцыдэнты, ажыццяўляецца без згоды фізічнай асобы», — гаворыцца ва ўказе.
Інфармацыя пра інцыдэнтах з АСАІ перадаецца пастаўшчыкам плацежных паслуг і праваахоўным органам на бязвыплатнай аснове.
Тым часам у СК і Нацбанку тлумачаць гэтыя змены жаданнем абараніць беларусаў ад махляроў.
Чытайце таксама
