У Беларусі можа з’явіцца больш структураў, якія вядуць ахоўную дзейнасць — магчыма, і ўзброеную. Прызначаць іх будзе асабіста Аляксандр Лукашэнка. Гэта прадугледжваецца папраўкамі ў адпаведны закон, які Палата прадстаўнікоў ужо прыняла ў двух чытаннях і накіравала ў Савет Рэспублікі.
Цяпер да арганізацый, якія займаюцца ахоўнай дзейнасцю, адносяцца:
- сілавыя структуры, МНС, памежныя і мытныя органы;
- Беларуская чыгунка;
- арганізацыі цывільнай авіяцыі;
- арганізацыі, якія маюць права стварэння ваенізаванай аховы;
- арганізацыі, якія не маюць права стварэння ваенізаванай аховы.
Пералік арганізацый па двух апошніх пунктах і так на гэты момант вызначае Лукашэнка. Аднак калі папраўкі ў закон набудуць моц, у яго з’явяцца яшчэ шырэйшыя магчымасці. Бо, згодна з праектам, да гэтых пяці пунктаў будзе дададзены яшчэ адзін — «іншыя арганізацыі», якія вызначаюцца «прэзідэнтам Рэспублікі Беларусь».
Такім чынам, Лукашэнка зможа даваць права весці ахоўную дзейнасць любым арганізацыям, якія, магчыма, не адпавядаюць замацаваным цяпер у законе фарматам. Не выключана, што ім дазволяць і карыстацца зброяй.
Цяпер арганізацыі, якія маюць права ахоўнай дзейнасці (напрыклад, прадпрыемства са службай аховы) маюць права ахоўваць сваіх работнікаў і свае аб’екты, усталёўваць ахоўныя сістэмы. Ваенізаваныя могуць пры гэтым выкарыстоўваць зброю.
Папраўкі здымуць для ахоўных арганізацый забарону на суправаджэнне тавараў і транспартных сродкаў, што перамяшчаюцца па тэрыторыі Беларусі пад мытным кантролем. Пакуль што займацца гэтым могуць толькі сілавыя структуры.
Акрамя таго, уводзіцца абавязковы кваліфікацыйны экзамен для работнікаў ваенізаванай і неваенізаванай аховы. Парадак яго правядзення будзе вызначаць МУС.
Законапраект упершыню паступіў у Палату прадстаўнікоў яшчэ зімой і ў сакавіку быў прыняты ў першым чытанні. 28 чэрвеня пасля правак (якіх менавіта, невядома) яго прынялі ў другім чытанні. Пасля ўхвалення ў Савеце Рэспублікі і падпісання Лукашэнкам закон уступіць у сілу праз паўгода.
Нагадаем, у Беларусі ўжо існуе прыватнае ахоўнае прадпрыемства «ГардСэрвіс». У чэрвені 2020 года Лукашэнка сваім указам надзяліў яго правам выкарыстоўваць агнястрэльную зброю. У іншых ПАП у краіне такіх прывілеяў няма. Арганізацыя звязаная з найбліжэйшым колам Лукашэнкі, а менавіта з ягоным даўнім паплечнікам Віктарам Шэйманам. У 2022 годзе кампанія павялічыла штат супрацоўнікаў і пачала актыўныя трэніроўкі з выкарыстаннем баявога ўзбраення і навучаннем штурмавым дзеянням. Інструктарамі былі спецназаўцы і байцы ПВК Вагнера. «Цяпер кампанія амаль не займаецца аховай аб’ектаў, а шчыльна трэніруецца па ваеннай тэматыцы», — паведамляла тады крыніца «Люстэрка».
Чытайце таксама
