6 красавіка была завершаная сумесная аперацыя КДБ Беларусі і ФСБ Расіі, заявіў Аляксандр Лукашэнка.
«Мы скончылі з Аляксандрам Васільевічам Бортнікавым (кіраўніком ФСБ Расіі. — Заўв. рэд.) сёння аперацыю. Мы найбліжэйшым часам праінфармуем грамадства. Мы затрымалі тэрарыста, які пракраўся на тэрыторыю Беларусі, і праз Расію яго хацелі вывезці ў іншую краіну. Правялі аперацыю ФСБ, КДБ. Накрылі ўсю сетку. Расіяне дапрацоўваюць па іншых напрамках, у Расіі», — сказаў Лукашэнка.
Ён таксама заявіў, што на тэрыторыі Беларусі і Расіі ёсць сховішчы са зброяй і выбухоўкай.
«Заходзяць і бяруць гэта. Вось як і ў Піцеры адбылася сітуацыя (гаворка пра выбух у кавярні, у якім загінуў ваенны блогер Уладлен Татарскі. — Заўв. рэд.). Хутчэй за ўсё, ніхто ў кішэнях праз мяжу не вязе боепрыпасы і выбухоўку. Сховішчы тут. І ў нас мы некалькі такіх накрылі. Таму мы ўчора вельмі сур’ёзна абмеркавалі пытанні бяспекі ў гэтым плане. Думаю, мы справімся», — падкрэсліў Лукашэнка.
Пры гэтым ён лічыць, што зброя ў Беларусь трапляе з Расіі.
«Проста патокам з Украіны пайшла зброя ў Расію, праз Расію да нас. У нас з Украінай мяжа намёртва закрытая. Праз Бранскую, іншыя вобласці пайшла зброя», — сказаў Лукашэнка.
З якой краіны тэрарыст, як менавіта ён пракраўся ў Беларусь, што ён планаваў зрабіць — Лукашэнка не патлумачыў.