Улады Беларусі высылаюць частку польскіх дыпламатаў з краіны. Гэта пацвердзіў у каментары Onet.pl прэс-сакратар МЗС Польшчы Лукаш Ясіна.
— Да вечара серады Мінск пакіне афіцэр сувязі Памежнай службы Польшчы. Імаверна, будуць высланыя і два польскія консулы з Гродна, — сказаў Ясіна.
На пытанне пра меры ў адказ прадстаўнік польскага дыпведамства заявіў, што пра іх паведамяць, як толькі яны будуць прынятыя.
Са спасылкай на ўласныя крыніцы выданне паведамляе, што цяпер у польскім урадзе праходзяць кансультацыі наконт магчымага адказу на гэты крок з боку рэжыму Лукашэнкі. Не выключана, што Польшча таксама прыме рашэнне пра высылку беларускіх дыпламатаў.
«Усе варыянты на стале», — неафіцыйна паведаміла крыніца Onet.pl.
Нагадаем, у пятніцу, 17 лютага, МЗС Беларусі выклікаў паверанага ў справах Польшчы і запатрабаваў прывесці штат генеральнага консульства Польшчы ў Гродне да колькаснага парытэту з генконсульствам Беларусі ў Беластоку. Таксама беларускі бок заявіў, што «не бачыць сэнсу далейшага знаходжання на сваёй тэрыторыі афіцэра сувязі Памежнай службы Польшчы».
Гэтыя меры сталі адказам на закрыццё Польшчай пункта пропуску «Баброўнікі» на мяжы з Беларуссю.