Міністэрства архітэктуры і будаўніцтва змяніла парадак прывязкі цаны квадратнага метра жылля, якое будуецца з дзяржпадтрымкай, да сярэдняга заробку. Адпаведная пастанова ведамства № 87 ад 17 кастрычніка была апублікаваная на Нацыянальным прававым інтэрнэт-партале 4 лістапада.
Дакумент уносіць змены ў пастанову № 30, прынятую Мінбудам 10 сакавіка 2022 года. Згодна са старым дакументам, цана квадратнага метра ў шматкватэрных дамах, якія будуюцца з дзяржпадтрымкай, прывязвалася да намінальнай налічанай сярэднямесячнай зарплаты ў канкрэтнай вобласці або горадзе Мінску, разлічанай нарастальным вынікам з пачатку года. Нарматыў гранічнай цаны «квадрата» не мог перавышаць памер такой зарплаты.
Цяпер жа цана квадратнага метра не будзе залежаць ад рэгіёна. Яна прывязваецца да велічыні сярэдняй зарплаты па ўсёй Беларусі (яе памер бярэцца з дадзеных Белстата).
Тое самае з нарматывам гранічнай цаны метра плошчы ў індывідуальных дамах, якія будуюцца з дзяржпадтрымкай. Раней гранічная цана не магла перавышаць сярэднюю зарплату па рэгіёне, цяпер — сярэднюю зарплату па ўсёй краіне.
Пастанова ўступае ў сілу з 5 лістапада.