Жыхарка Мінска выклала ў TikTok відэа пра сваю паездку ў тралейбусе ў адзін з нядаўніх гарачых дзён. Нягледзячы на кандыцыянер, які працаваў, тэмпература ў салоне была +40°С: кіроўца замест халоднага паветра чамусьці ўключыла цёплае. Цяпер гараджанка разам з каментатарамі гадае, як такое магло адбыцца.
@aleks_gerl ♬ original sound — Meaw
«Напісана: працуе кандыцыянер. Мы ледзь не здохлі за адзін прыпынак. Аказалася, кіроўца на цяпло, а не на холад уключыла», — напісала карыстальніца TikTok з тралейбуса. Як доказ сваіх словаў яна паказала табло з тэмпературай у салоне, што дасягнула +40°С.
Паводле мінчанкі, у такіх умовах яна «ледзь вытрымала» два прыпынкі. Пры гэтым вокны, як і належыць у транспарце з кандыцыянерам, былі зачыненыя.
У каментарах карыстальнікі прапанавалі мноства версій, чаму ў салоне тралейбуса магла ўтварыцца такая спёка: ад «кіроўца нешта пераблытала» да «гэта каб менш ездзілі».
- «У [кіроўцы] забіты кандыцыянер, <…> але іх ніхто чысціць не будзе».
- «Ды ўключаюць печкі на салон, [бо рухавік] пераграваецца».
Некалькі чалавек дапусцілі, што «там нешта зламалася ці скончылася».
«Цяпер гэтая вечная праблема. Або фрэон скончыўся, або яшчэ што магло быць», — разважае адзін карыстальнік. «Міф пра тое, што фрэон „заканчваецца“, не мае глебы пад нагамі. Запомніце, фрэон у кандыцыянеры не выдаткоўваецца», — адказалі яму.
Іншыя карыстальнікі падзяліліся сваімі гісторыямі пра цяжкія паездкі ў транспарце з кандыцыянерам, які не працаваў (ці працаваў дзіўна) :
- «Я так зайшла, прабіла талон і выйшла».
- «Я адзін раз сеў у аўтобус, і там была ўключаная печка і напісана „52°С“. Я калі выйшаў на двор, дзе было 30 °C, так астудзіўся».
- «У нас з’явіўся новы аўтобус з кандыцыянерам. Я радавалася, калі некаторыя шукалі, дзе схавацца ад кандэя. Праз некалькі гадзін мая радасць стала трывожнай, бо было холадна, прастудзіла шыю. Кандуктар сказаў, што ўсе кандыцыянеры не могуць адключацца па адным».
Каментатары просяць кіроўцаў перад выхадам на лінію «правяраць транспартны сродак, уключаючы і кандыцыянер».
Але ёсць і тыя, хто нават бачыць плюсы ў такой сітуацыі:
«Людзі, радуйцеся, вы па цане аўтобуса ў лазні пабывалі».
Чытайце таксама
