У тэлеграм-канале лідара Ліберальна-дэмакратычнай партыі Алега Гайдукевіча 7 верасня быў апублікаваны фотаздымак эрэгіяванага мужчынскага пеніса. Палітык патлумачыў гэта «спробай узлому».
Здымак быў апублікаваны ў 12.59 паводле мінскага часу. Наступным пастом, у 13.01, у тэлеграм-канале Гайдукевіча з’явілася спасылка з запрашэннем глядзець увечары на БТ прапагандысцкае шоу «Клуб рэдактараў». Паводле звестак сэрвісу TGstat, у 13.14 здымак быў выдалены.
У 13.19 у тэлеграм-канале з’явіўся новы запіс: «Сябры, нас спрабуюць узламаць! Прэс-служба працуе над ліквідацыяй непаладак! Спрабуюць узламаць і тэлеграм-каналы нашыя, і „ВКонтакте“».
Пасля гэтага былі апублікаваныя іншыя запісы, якія адпавядаюць тэматыцы канала Гайдукевіча. Адзначым, што ў пабліку ЛДПБ «ВКонтакте» паведамленне пра спробу ўзлому адсутнічае.
Нагадаем, што ў Беларусі прадугледжаная адказнасць за выраб і распаўсюд парнаграфічных матэрыялаў або прадметаў парнаграфічнага характару.
Па законе распаўсюд або рэкламаванне парнаграфічных матэрыялаў і іх захоўванне з такімі мэтамі першы раз караюцца па артыкуле 19.7 Кодэкса аб адміністрацыйных правапарушэннях. За гэта могуць даць штраф ад 2 да 30 базавых велічыняў (цяпер гэта 1110 рублёў).
У выпадку, калі чалавек другі раз цягам года быў абвінавачаны ў тым, што распаўсюджваў, рэкламаваў або захоўваў з такімі мэтамі парнаграфічныя матэрыялы, то заводзіцца крымінальная справа па частцы 1 арт. 343 КК. Па гэтай жа частцы караюцца выраб парнаграфіі з мэтай распаўсюду і яе публічная дэманстрацыя, трансляцыя. Частка 1 арт. 343 КК прадугледжвае пакаранне ў выглядзе грамадскіх работ, штрафу, папраўчых работ на тэрмін да 2 гадоў або арышту (ён даецца на тэрмін да 3 месяцаў).
Санкцыя часткі 2 арт. 343 больш сур’ёзная — ад 2 да 4 гадоў абмежавання альбо пазбаўлення волі. Па гэтай частцы караюць тыя ж дзеянні, што ў частцы 1, калі яны здзейсненыя з карыслівых меркаванняў або арганізаванай групай ці калі дарослы перадаваў або паказваў парнаграфію дзіцяці.
Крымінальных справаў за распаўсюд порна ў Беларусі заводзіцца сотні штогод. Напрыклад, у 2022-м было 234 такія справы.
Раней у МУС паведамлялі, што супрацоўнікі падраздзяленняў па супрацьдзеянні гандлю людзьмі на пастаяннай аснове праводзяць аператыўна-вышуковыя мерапрыемствы па выяўленні асобаў, якія маюць дачыненне да арганізацыі порнастудый і масавага распаўсюду парнаграфічных матэрыялаў.
Чытайце таксама
