КДБ затрымаў супрацоўніка крымінальнага вышуку Докшыцкага РАУС і ўдзельніка палітычных рэпрэсій капітана Міхаіла Згірскага. Міліцыянта абвінавачваюць у кіраўніцтве бандай серыйных рабаўнікоў фур, пра затрыманне якой днямі адрапартавалі сілавікі, піша «Наша Ніва» са спасылкай на свае крыніцы.
МУС 20 траўня паведаміла пра затрыманне пяцярых жыхароў Оршы, якія рабавалі фуры на стаянках па ўсёй Беларусі, выкарыстоўваючы балаклавы і радыёстанцыі. Пакуль кіроўца спаў у кабіне, зламыснікі ламалі замак грузавога адсека, загружалі свой мікрааўтобус крадзеным таварам — ад тэхнікі да харчавання — і з’язджалі з месца злачынства. Скрадзенае потым прадавалі ў Расіі ці карысталіся самі.
Фігурантаў затрымалі ў Гомельскай вобласці пры сілавой падтрымцы АМАП. Вядома пра шэсць эпізодаў іх злачыннай дзейнасці.
Паводле інфармацыі «Нашай Нівы», схопленыя аршанскія ўдзельнікі банды пасля затрымання выдалі асобу іншага суўдзельніка, які і зрабіў схему магчымай дзякуючы свайму спецыфічнаму доступу да інфармацыі і веданню метадаў канспірацыі.
Кіраўніком банды налётчыкаў аказаўся 27-гадовы капітан Докшыцкага крымінальнага вышуку Міхаіл Згірскі, піша выданне. У яго ёсць жонка і дзіця.
Паводле звестак «Нашай Нівы», Згірскі не толькі перадаваў удзельнікам банды інфармацыю пра ход расследаванняў крымінальных справаў па здзейсненых эпізодах і дапамагаў планаваць рабаванні, але і сам удзельнічаў у гэтых налётах.
У кватэры Згірскага знайшлі іншую, адрозную ад табельнай, зброю, якая фігуравала ў заявах пацярпелых, а таксама адзенне з арыенціровак і балаклаву, паведамляе выданне.
Сам Згірскі родам з блізкага да Оршы Талачына і нібыта даўно меў сувязі з крыміналізаванымі землякамі. Крымінальная справа знаходзіцца на асаблівым кантролі ў кіраўнікоў МУС, Следчага камітэта, Генеральнай пракуратуры і КДБ. Іншыя супрацоўнікі крымінальнага вышуку Докшыцкага РАУС часова адхіленыя ад службы і правяраюцца на прадмет датычнасці да крыміналу, піша «Наша Ніва».
Адзначаецца, што адразу пасля затрымання Згірскага ў раёне нават памянялі міліцэйскае начальства.
Акрамя таго, Згірскі датычны да палітычных рэпрэсій: ён затрымліваў грамадзян за ўдзел у акцыях пратэсту і выказванне нязгоды з рэжымам Аляксандра Лукашэнкі, адзначае выданне.