Жыхарка Мінска звярнулася ў міліцыю пасля таго, як прайшла курсы трэйдынгу і засталася без грошай, а таксама ледзь не трапіла ў пастку ашуканцаў другі раз. Пра гэта паведамілі ў прэс-службе МУС Беларусі.
Высветлілася, што 54-гадовая мінчанка знайшла ў інтэрнэце курсы трэйдынгу і звязалася з выкладчыкам у месенджары. Ён растлумачыў ёй, што навучанне праводзіць ва ўмовах рэальных таргоў, а таксама расказаў, як зарэгістравацца на крыптабіржы і папаўняць баланс.
«Патэлефанавала чалавеку на вайбер. Напісала, спытала, як гэта ўсё адбываецца. Усё вельмі проста. Вучыцца нічому не трэба. У ходзе справы ён мяне навучыць», — расказала пацярпелая.
Паводле яго інструкцыі жанчына рэгулярна «інвеставала», у выніку сума перавысіла дзесяць тысяч рублёў. Калі на яе рахунку нібыта назапасіўся прыбытак на суму больш чым 70 тысяч, яго заблакавалі, а каб вывесці грошы, жанчыне сказалі пакласці яшчэ столькі ж.
«Яны сказалі, што даюць мне 24 гадзіны, каб я сабрала грошы і правяла такі ж плацёж», — дадала мінчанка.
Пасля гэтага яна знайшла «юрыстаў» у сеціве, каб ёй дапамаглі вывесці грошы. Тыя запатрабавалі за свае паслугі 20% ад сумы, якую трэба вывесці, прычым плаціць трэба было ў дзень заключэння дамовы.
«Мне траплялася рэклама ў інтэрнэце, што займаюцца вяртаннем сродкаў. Юрыдычныя кампаніі ўсякія. Звязалася з юрыстам, ён мне сказаў, што мне давядзецца аплаціць 20%», — успамінае пацярпелая.
Толькі тады да мінчанкі дайшло, што яна стала ахвярай махляроў.
Следчыя распачалі крымінальную справу за махлярства, а ў МУС нагадалі, што абяцанні лёгкага заробку на інвестыцыях у інтэрнэце — гэта, як правіла, схема махляроў.