Апеляцыйны суд: Трамп не мае імунітэту па справе пра скасаванне вынікаў выбараў

Апеляцыйны суд акругі Калумбія вырашыў, што былы прэзідэнт ЗША Дональд Трамп не мае імунітэту ад судовага пераследу па справе пра меркаваную спробу скасаваць вынікі выбараў 2020 года, піша Руская служба Бі-бі-сі.

Трамп заяўляў, што ў яго імунітэт, бо ён дзейнічаў у сваім афіцыйным статусе прэзідэнта да і падчас беспарадкаў у Капітоліі.

Яго адвакаты таксама неаднаразова заяўлялі, што былога прэзідэнта нельга судзіць крымінальным судом за дзеянні, звязанымі з выкананнем ім прэзідэнцкіх абавязкаў.

Аднак гэты аргумент у пачатку снежня быў адхілены вашынгтонскім акруговым суддзёй. Трамп заявіў тады, што абскардзіць гэтае рашэнне.

Чакаецца, што экс-прэзідэнт падасць апеляцыю і на сённяшняе рашэнне, і ў выніку вердыкт будзе выносіць Вярхоўны суд ЗША.

Спецыяльны пракурор Джэк Сміт абвінаваціў 77-гадовага Трампа ў змове з мэтай ануляваць перамогу Джо Байдэна на выбарах 2020 года.

Судовае разбіральніцтва па гэтай справе спачатку прызначылі на 4 сакавіка, але адклалі да вынясення рашэння па пазове пра імунітэт.

Яго могуць адкласці на некалькі тыдняў ці месяцаў, калі справа трапіць у Вярхоўны суд.