У Мінску сілавікі праводзяць масавыя ператрусы, у тым ліку ў людзей, звязаных з Каардынацыйнай радай, паведаміў праваабарончы цэнтр «Вясна».
Праваабаронцы 28 лістапада атрымліваюць інфармацыю пра масавыя ператрусы ў Мінску. Дакладна вядома як мінімум пра шэсць такіх фактаў.
«Адзначым, што ў двух выпадках ператрусы праходзяць у людзей, звязаных з Каардынацыйнай радай», — паведаміла «Вясна».
Пра сувязь з КР пішуць і праўладныя тэлеграм-каналы. Так, ГУБАЗіК паведаміў, што «сілавікі пачалі папярэдні этап падрыхтоўкі да выбараў у „Каардынацыйную раду“».
У прэс-службе КР пацвердзілі масавыя ператрусы ў людзей, звязаных з Каардынацыйнай радай.
Пазней стала вядома, што сілавікі прыйшлі па месцы прапіскі кіраўніка Руху «За Свабоду» Юрася Губарэвіча. «Дзіўныя людзі прыходзілі шукаць маю маёмасць па месцы прапіскі», — напісаў ён у Facebook.
І дадаў, што, «ведаючы бандыцкую сутнасць гэтага рэжыму», усё распрадаў яшчэ да канца 2021 года.
Таксама Народнае антыкрызіснае ўпраўленне паведаміла пра ператрусы ў Паўла Латушкі і іншых чальцоў каманды НАУ. Там адзначылі, што на іх дзейнасць гэта не паўплывае.
«Сёння да родных многіх супрацоўнікаў каманды Народнага антыкрызіснага ўпраўлення, а таксама ў кватэры, дзе яны раней пражывалі, прыйшлі з вобшукам супрацоўнікі беларускіх спецслужбаў. Па нашых звестках, гэта адбываецца адначасова, масава і датычыцца прадстаўнікоў многіх дэмакратычных сілаў Беларусі. З вобшукам прыйшлі і да дому Паўла Латушкі», — гаворыцца ў паведамленні Паўла Латушкі.
Самі сілавікі паведамілі пра ператрус у аналітыка і вядоўцы вечаровага шоу Сяргея Чалага. Яны выклалі фота з кватэры на вуліцы Усходняй.
Усе яны жывуць за межамі Беларусі.