У Беларусі ўнесеныя змены ў закон «Аб мовах», які з 1990 года рэгламентуе моўную палітыку дзяржавы. Сярод іншага цяпер адмяняецца права на атрыманне адукацыі на мове нацменшасці ў школах. Адпаведны дакумент апублікаваны на Нацыянальным прававым інтэрнэт-партале.
Артыкул 10 закона «Аб мовах» датычыць дакументаў грамадзян Беларусі. Удакладняецца, што звычайны, біяметрычны, біяметрычны дыпламатычны і службовы пашпарты, а таксама ID-карта выдаюцца на беларускай, рускай і англійскай мовах. Першапачаткова замест англійскай мовы былі пазначаныя «іншыя мовы».
Вядзенне судаводства (артыкул 14) і справаў аб адміністрацыйных правапарушэннях (артыкул 15) дапускаецца на беларускай і рускай мовах (раней — на беларускай або рускай мовах).
Артыкул 22 замацоўвае, што атрымліваць дашкольную, агульную сярэднюю і спецыяльную адукацыю можна на беларускай і (або) рускай мовах. У ранейшай рэдакцыі — «на беларускай або рускай мовах». Пры гэтым скасоўваецца права на атрыманне адукацыі на роднай мове для асобаў іншых нацыянальнасцяў, якія жывуць у Беларусі.
Згодна з новай рэдакцыяй закона, у адпаведнасці з пажаданнямі выхаванцаў, навучэнцаў і іх законных прадстаўнікоў па рашэнні мясцовых уладаў і па ўзгадненні з Мінадукацыі могуць стварацца асобныя групы ў дзіцячых садках, дзе выхаванцы вывучаюць мову нацыянальнай меншасці, а таксама аналагічныя класы ў школах.
Ад вывучэння беларускай і рускай моваў могуць быць вызваленыя грамадзяне іншых краін і асобы без грамадзянства, якія часова жывуць у Беларусі.
Акрамя таго, пры наяўнасці ўмоваў і, зноў жа, пры ўзгадненні з Мінадукацыі выкладанне праграм дашкольнай, агульнай сярэдняй і спецыяльнай адукацыі можа весціся на замежных мовах.
Змены ў закон уступаюць у сілу пасля афіцыйнага апублікавання.
