У кыргызскай вёсцы Дзмітрыеўка раніцай 17 траўня сілавікі правялі аперацыю па затрыманні тэрарыста. Зладзілі перастрэлку, пачаўся пажар. Пры гэтым пацярпелі турысты, якія жылі побач, у тым ліку беларускі блогер і падарожнік Юрый Дрозд: уся іх маёмасць цалкам згарэла. Пра гэтую гісторыю ён расказаў у сябе ў TikTok.
@name_jura_drozd жив и здоров. хочу проложить путешествие, поэтому начинаю копить на новый рюкзак, палатку и спальный мешок. поддержать можно через донат на kaspi 44оо_4зо2_7з29_787б и баланс мегаком 99б-554-ll-O8−9l
Інцыдэнт адбыўся 17 траўня ў вёсцы Дзмітрыеўка, за 30 кіламетраў ад Бішкека — сталіцы Кыргызстана, піша 24.kg. Раніцай мясцовы спецназ праводзіў там спецаперацыю па затрыманні ўзброенага тэрарыста. Пачалася перастрэлка, злачынец быў забіты, пацярпелі і два сілавікі.
Загінулы за некалькі дзён да здарэння зняў палову дома ў жыхароў Дзмітрыеўкі. А ў другой палове яшчэ раней пасяліліся турысты з Беларусі, Расіі і Францыі: усяго на момант пачатку аперацыі там знаходзіліся 13 чалавек. Падчас перастрэлкі яны не былі параненыя, але ўся іх маёмасць згарэла ў пажары.
У гэтай кампаніі быў беларускі блогер і падарожнік Юрый Дрозд. Як ён расказаў у сацсетках, прыгода пачалася, а 6 гадзіне раніцы — турыстаў пабудзілі людзі ў цывільным і папрасілі на выхад. Усе рэчы пры гэтым давялося пакінуць унутры.
— Я выскачыў басанож і дзякуй богу, што ўзяў смартфон — у іншых і смартфона не было, — кажа Юрый.
@name_jura_drozd моё самое страшное утро. все личные вещи сгорели от пажара во время захвата плохих соседей
Замежнікаў адвялі далей, у гэты час прыехалі бронетранспарцёры са спецназам, і завязалася доўгая перастрэлка. Мужчына, які знаходзіўся ўнутры, са словаў беларуса, выкрыкваў ісламісцкія лозунгі.
Нарэшце сілавікі пачалі кідаць гранаты, і дом загарэўся. Пажар знішчыў усю маёмасць турыстаў — рэчы, дакументы, грошы і банкаўскія карткі.
Улады адвезлі пагарэльцаў у суседні горад Кант і пасялілі ў інтэрнаце. Паводле Юрыя, ім таксама дапамагаюць мясцовыя жыхары — прыносяць вопратку.
Падарожнік ужо звязаўся з беларускай амбасадай — яму паабяцалі паспрыяць з аднаўленнем дакументаў.
А яшчэ ён збірае данаты на новы заплечнік, палатку і спальны мяшок — дапамагчы яму можна праз звесткі, якія ён падаў у сваім акаўнце.
