Лідар гурта Leibonik, Сяргей Башлыкевіч, выпусціў разам з кліпам песню Slimak. Гэта другі трэк альбома «ТАМ». Першым быў Emigrant Song, які набраў больш за 107 тысяч праглядаў на YouTube і стаў самым папулярным відэа музыкі.
У новай песні Башлыкевіч спявае, напрыклад, «мне тут кажуць, што я трошачку пасунуўся кабінай, але я ўсур'ёз гатовы стаць вандроўнаю машынай».
«Стаць пассатам бэ чатыры, на мяжы касіць банкноты,
Трыста літраў поўны бак — адсмакчыце, аўтаботы!», — працягвае Сяргей.
Ёсць і такое:
«Мару і планую як ўсю зямлю аб’еду,
Мякка лёгшы на канапу пасля сытнага абеду,
І пакуль мяне чакае цудаў свету асарці
Мне бы вылезці з-пад коўдры: адзеялка, отпуці!»
Як указана, песня напісана ў Амстэрдаме, Мінску, Варшаве і Жодзіна.
Нагадаем, Башлыкевіч рыхтуе да выхаду альбом «ТАМ». Гэта хроніка апошніх двух гадоў.
«Кароткая гісторыя таго, як жыў я. Як жылі мы», — напісаў аўтар. Зараз песні знаходзяцца на стадыі звядзення і майстарынгу, а музыка з гэтай нагоды збірае данаты. Плануюцца да выхаду 10 песень.