«Сур'ёзна?» Германія злавіла МЗС Расіі на скажэнні гістарычнай праўды пра ўварванне ў Польшчу

20 верасня 2024 у 1726837080
«Зеркало»

Міністэрства замежных справаў Расіі ў 85-ю гадавіну ўварвання СССР і нацысцкай Германіі ў Польшчу апублікавала ў Х пост, згодна з якім Чырвоная армія не дапусціла генацыду насельніцтва Заходняй Беларусі і Заходняй Украіны. МЗС Германіі ў адказ выклала план падзелу Польшчы з подпісамі Іосіфа Сталіна і міністра замежных справаў Трэцяга рэйха Яахіма фон Рыбентропа і задало пытанне: «Сур'ёзна?» Увагу на гэта звярнула выданне «Агентство».

Скрыншот паста МЗС Германіі з картай падзелу Польшчы з подпісамі Сталіна і Рыбентропа. Скрыншот: t.me/agentstvonews

У відэароліку расійскага міністэрства сцвярджаецца, што савецкія войскі вызвалілі Заходнюю Беларусь і Заходнюю Украіну ад польскай акупацыі, а спробы выставіць СССР агрэсарам «супярэчаць гістарычнай праўдзе і фактам». Як сцвярджаюць у МЗС, Савецкі Саюз не раз прапаноўваў Польшчы дапамогу ў адбіцці нямецкай агрэсіі, а Варшава «падтрымлівала агрэсіўную палітыку нацыстаў».

Нямецкае Міністэрства замежных справаў адказала Расіі на наступны дзень, напісаўшы реплай да паста МЗС Расіі. Публікацыю карты падзелу Польшчы МЗС ФРГ суправадзіла хэштэгамі «#ПактМолатаваРыбентропа» і «#ПактГітлераСталіна».

Скажае гісторыю і Уладзімір Пуцін. У інтэрв'ю Такеру Карлсану ён сцвярджаў, што менавіта Польшча ў 1939-м «змусіла» нацысцкую Германію ўварвацца на яе тэрыторыю. Польскае МЗС назвала такую заяву ілжывай і запярэчыла, што гітлераўская Германія і савецкія ўлады падпісалі пагадненне супраць Польшчы - той самы пакт Молатава - Рыбентропа.

Чытайце таксама