Польшча папярэдзіла пілотаў пра «незапланаваную вайсковую дзейнасць» ля мяжы з Беларуссю

5 лютага 2024 у 1707109140
«Зеркало»

Аператыўнае камандаванне УС Польшчы і Агенцтва аэранавігацыі распаўсюдзілі навігацыйнае папярэджанне для палётаў ва ўсходняй частцы краіны - уздоўж межаў з Беларуссю, Расіяй і Украінай. Папярэджанне звязанае з магчымай «незапланаванай вайсковай дзейнасцю ў сувязі з забяспечаннем бяспекі дзяржавы».

«На просьбу вайсковага боку Польскае агенцтва аэранавігацыі публікуе Notam № 604/2024. Ён уводзіць навігацыйнае папярэджанне для карыстальнікаў паветранай прасторы ў перыяд з 5 лютага 2024 года 6.00 UTC да 5 траўня 2024 года 6.00 UTC», - гаворыцца ў паведамленні.

Аператыўнае камандаванне патлумачыла, што самалётам у адзначанай на карце зоне неабходна «захоўваць наладкі радыёсувязі паветра - зямля», а таксама рэкамендуецца ўключыць радыёлакацыйны адказчык у рэжымах A, C і S. Камандаванне папярэдзіла цывільную авіяцыю пра, «магчыма, больш актыўную працу ВПС ва ўсходняй частцы краіны ў якасці адказу на пагрозу».