Ціханоўская выказала спачуванні праз гібель шасці беларусаў падчас буры. А вось як адгукнуліся Лукашэнка і чыноўнікі
16 лiпеня 2024 у 1721130120
«Зеркало»
Лідарка беларускіх дэмсілаў Святлана Ціханоўская выказала спачуванні праз гібель шасці чалавек, у тым ліку дваіх дзяцей, чые жыцці забрала бура, якая здарылася на выходных. Яна таксама паспачувала тым, хто сутыкнуўся з бытавым калапсам у выніку ўрагану. Між тым беларусы не дачакаліся словаў спагалы з нагоды трагедыі ні ад Аляксандра Лукашэнкі, ні ад іншых высокапастаўленых чыноўнікаў.
- Я забітая горам праз трагічную гібель шасці чалавек - жудасныя наступствы ўрагану ў Беларусі. Многія людзі на поўдні краіны застаюцца без электрычнасці і вады. Мы з Сяргеем (муж палітыка Сяргей Ціханоўскі. - Заўв. рэд.) пражылі некалькі гадоў у гэтым цудоўным рэгіёне, і мае думкі цяпер з усімі, каго закранула тое, што адбылося, - напісала Ціханоўская ў Х.
Між тым Аляксандр Лукашэнка адрэагаваў на стыхійнае бедства значна больш стрымана. На наступны дзень пасля нядзельнага ўрагану ён ніяк яго не пракаментаваў нават пасля таго, як МНС паведаміла пра гібель у выніку непагадзі шасці чалавек (сярод іх - двое дзяцей).
Мяркуючы з сайта яго прэс-службы, у панядзелак палітык паспеў сустрэцца з кіраўніком расійскай Чувашыі Алегам Мікалаевым, падпісаў пару ўказаў пра мытныя пагадненні з Кубай і Нікарагуа і ўручыў узнагароды супрацоўнікам Камітэта дзяржкантролю. Аднак часу выказаць спачуванні блізкім загінулых беларусаў і пацярпелым (іх не менш за 15 чалавек) у Лукашэнкі не знайшлося.
Ужо раніцай 16 ліпеня прэс-служба Лукашэнкі паведаміла, што ён «трымае на асабістым кантролі ход аднаўленчых работ па ліквідацыі наступстваў стыхіі», і ўвесь гэты час Лукашэнку дакладвалі пра прагрэс у «максімальна інтэнсіўным тэмпе». Даручэнні па ліквідацыі наступстваў непагадзі палітык даў кіраўнікам шэрагу міністэрстваў і ведамстваў, а таксама першаму віцэ-прэм'еру Мікалаю Снапкову і віцэ-прэм'ерам Анатолю Сіваку і Пятру Пархомчыку.
Нарэшце, Лукашэнка «асабліва падкрэсліў гераічную працу тых, хто ліквідаваў наступствы стыхіі, у тым ліку энергетыкаў, спецыялістаў лясной гаспадаркі, і прасіў перадаць падзяку ўсім, хто браў удзел у найцяжэйшай працы па ліквідацыі наступстваў стыхіі».
Пасля гэтага ён сустрэўся з губернатарам Прыморскага краю Расіі Алегам Кажамякам і схадзіў на цырымонію ўшанавання выпускнікоў вайсковых ВНУ і найвышэйшага афіцэрскага складу. Там Лукашэнка паставіў дэдлайн на ліквідацыю наступстваў урагану кіраўніку МНС Вадзіму Сіняўскаму і дзяржсакратару Савета бяспекі Аляксандру Вальфовічу. Аднак зноў не палічыў патрэбным публічна выказаць спачуванне блізкім загінулых і пацярпелым беларусам.
Адзначым, спачуванняў публічна таксама не выказалі кіраўнік МНС і дзяржсакратар Савета бяспекі, прэм'ер-міністр Раман Галоўчанка, віцэ-прэм'еры і іншыя высокапастаўленыя асобы. Фактычна гэта зрабіў толькі адзін чыноўнік - старшыня Гомельскага абласнога выканаўчага камітэта Іван Крупко.
- Паважаныя жыхары Гомельскай вобласці! Вы ўсе ведаеце, як сур'ёзна пацярпеў наш рэгіён 14 ліпеня ў выніку ўраганнага ветру, хуткасць якога часам дасягала 29 метраў за секунду. Самае трагічнае, што не абышлося без чалавечых ахвяр. Прыношу шчырыя спачуванні родным і блізкім загінулых, - сказаў Крупко 15 ліпеня, звяртаючыся да жыхароў Гомельшчыны і абвяшчаючы пра ўвядзенне ў вобласці рэжыму НС.
Нагадаем, паводле звестак МНС, 13−14 ліпеня ад урагану загінулі шэсць чалавек, з іх два дзіцяці, траўмаваныя - 15.