СМІ: У Беларусі закрылі каля 10 школ і курсаў, дзе вучылі польскай мове

10 студзеня 2024 у 1704878820
«Зеркало»

Беларускія ўлады абрынулі шквал рэпрэсій на моўныя школы з выкладаннем на польскай мове, піша Dziennik Gazeta Prawna. Сілавікі шукаюць там уладальнікаў карт паляка, мяркуе выданне.

Беларускія сілавікі, паводле звестак выдання, дабіліся закрыцця каля 10 прыватных установаў, якія вучаць польскай мове. Іх кіраўнікоў затрымліваюць, патрабуюць спісаў выкладчыкаў і студэнтаў.

Прапаганда пагражае рэпрэсіямі больш чым 160 тысячам чалавек, якія маюць карты паляка, адзначае выданне.

Для прыкладу прыводзіцца сітуацыя са школай PanProfesor. Гэта анлайн-платформа па вывучэнні польскай мовы. Да іх сілавікі прыйшлі 21 снежня, а 5 студзеня кампанія рссказала пра здарэнне ў Facebook. Ад яе запатрабавалі перастаць рэкламаваць паслугі, закрыць офіс, спыніць заняткі (ужо падчас візіту «гасцей» былі сарваныя шыльды з надпісам PanProfesor з дзвярэй) і самастойна ліквідаваць кампанію.

Нагадаем, паводле сілавікоў, «адбылася масавая ліквідацыя» кампаній, якія дапамагалі вучыць польскую мову. У ГУБАЗіК лічаць, што яны «агітавалі атрымліваць карты паляка».