Новы хіт Molchat Doma і кліп са стала патолагаанатама. Падборка навінак беларускай музыкі за жнівень
2 верасня 2024 у 1725281520
«Зеркало»
У жніўні было ўсё гэтак жа шмат эксперыментаў, адкрыццяў і добрай музыкі як ад пачаткоўцаў, так і ад добра вядомых імёнаў на беларускай сцэне. Каманда тэлеграм-канала «КЛІК» сабрала пяць найлепшых навінак гэтага месяца і прапануе з імі пазнаёміцца.
Molchat Doma - Belaya Polosa
Відаць, гэта апошні сінгл з будучага вераснёўскага альбома сусветна вядомых панурых беларускіх пост-панкаў. Гучанне гэтага трэка цытуе не менш змрочных брытанцаў, Depeche Mode, у перыяд іх самых «цёмных» работ. Гэта шалёна якасны трып-хоп і рытмічная альтэрнатыва разам з экзістэнцыйнай лірыкай і пад соусам авангарднага кліпа. У гурта Molchat Doma дакладна атрымалася ажывіць гэты вытанчаны і загадкавы жанр. Робім высокія стаўкі на будучы альбом і чакаем яго рэлізу.
Temperer - Faced Out
Метал ад гурта Temperer па-ранейшаму трымае высокую планку якасці. Faced Out - усяго толькі трэці трэк у каталогу групы. Але ўсе тры трэкі падаюць вялікія надзеі на далейшае паспяховае развіццё гурта. Гэта сапраўдны металкор з усімі неабходнымі элементамі: экстрым-вакал, брэйкдаўны і самаразбурэнне. Трэк развіваецца і даволі незвычайна раскрываецца ў канцы, таму поўнае праслухоўванне абавязковае.
«Бачу ўпершыню» - «Планы на лета»
Планы на лета сфармаваліся за дзень да канца таго самага лета? Якая розніца, калі яны ўсё роўна не былі б выкананыя? Бо ўсё пайшло наперакасяк праз каханне, што звалілася на галаву як снег у траўні. Пра гэта і апавядае трэк гурта «Бачу ўпершыню» - бадай, самы летні ў рэпертуары маладога калектыву. Тое самае настальгічнае гучанне, якое вяртае ў самае цёплае і бесклапотнае, крыху па-дзіцячаму наіўнае лета. Не хвалюйцеся пра нявыкананыя планы. Слухайце «Планы на лета» і будуйце іх ужо на наступнае.
Sw@da, Niczos, Lua Preta, Anastasia Rydlevskaya - Huki Nočy
Калабарацыя лета, якая аб'ядноўвае тры светы, мовы і культуры: польскую, беларускую і, нечакана, ангольскую. Партугальскамоўная выканаўца ангольскага паходжання Lua Preta, падляшскія тусоўшчыкі Sw@da і Niczos і беларуская візіянерка і музыка Anastasia Rydlevskaya вельмі гарманічна сплялі гэтыя культуры, паказаўшы, наколькі кожная з іх яркая і цікавая. З гэтага выканаўцы ўмела зрабілі жывы і адначасова чароўны чатыроххвілінны трэк, якога вам так не хапала ў летнім плэйлісце.
«Сны Cиней Cобаки» - «Крутой»
Першы кліп гурта і адразу ж найвышэйшы ўзровень. Відэа на поп-панкавы трэк «Крутой» і адначасова іранічная экранізацыя сумнага факту пра тое, што на стале патолагаанатама ўсе роўныя. Там няма крутых. Галоўную ролю сыграў актор тэатра і кіно Анатоль Гур'еў, і яго майстэрства добра прыкметнае ў яго рухах, драматычных танцах і цынічнай міміцы. А кіношнасць і якасны візуал - заслуга рэжысёра Жоры Бізюка і каманды Krok Films.