«Навучыўся па вуснах чытаць». Знакаміты ў мінулым брамнік хакейнай зборнай Андрэй Мезін расказаў пра праблемы са здароўем

9 лiпеня 2024 у 1720505700
«Зеркало»

8 ліпеня знакамітаму ў мінулым галкіперу зборнай Беларусі споўнілася 50 гадоў. У інтэрв'ю тэлеканалу «Беларусь 1» Андрэй Мезін расказаў, чаму выкарыстоўвае навушнік на камандных зборах.

«Я нядаўна правяраўся, і ў мяне 70% слыху страчана. А маўленне пастаўленае так, што людзі, якія кепска чуюць з дзяцінства, не могуць так размаўляць. Таму яны не могуць зразумець, што я рэальна кепска чую. Я навучыўся па вуснах чытаць, глядзець суразмоўцу ў твар. Я навучыўся даваць рады сабе, эмоцыям… Я выкарыстоўваю навушнікі, калі сустрэчы праходзяць, каб нічога не прапусціць. На трэнерскім мастку ў мяне навушнік, каб сувязь трымаць з усімі», - сказаў Мезін.

Паводле маці Андрэя Галіны, слыхавы нерв хлопчыка пашкодзіла доктарка падчас нараджэння.

Мезін прыйшоў на свет у 1974 годзе ў Чалябінску. У 17 гадоў спартовец пераехаў у Беларусь. Ён правёў за нашую зборную 15 чэмпіянатаў свету (з іх 13 - у наймацнейшым дывізіёне) і тры Алімпіяды. Андрэй быў прызнаны найлепшым брамнікам чэмпіянату свету - 2009 і трапіў у сімвалічную зборную паводле версіі медыя на ЧС-2006. Беларусы тады сталі шостымі - найлепшая пазіцыя нацыянальнай каманды на планетарных першынствах. У чвэрцьфінальным матчы на Алімпійскіх гульнях - 2002, калі нашая зборная сенсацыйна перамагла шведаў (4:3), Мезін адбіў 44 кідкі.

Сёння ён уваходзіць у трэнерскі штаб мінскага «Дынама».