Узламаны папулярны беларускі партал Realt.by — у сеціва выцеклі дадзеныя 900 тысяч карыстальнікаў

Узламаны папулярны беларускі партал пра нерухомасць Realt.by — уцечка інфармацыі можа закрануць 900 тысяч карыстальнікаў, паведамілі ў Нацыянальным цэнтры абароны персанальных дадзеных.

«У цэнтр паступіла паведамленне пра парушэнне сістэмы абароны персанальных дадзеных ТАА „РыэлтБай“ — партала жылой і камерцыйнай нерухомасці ў Беларусі. Арыентаваная колькасць суб’ектаў персанальных дадзеных, закранутых інцыдэнтам, — 900 тысяч», — расказалі ў арганізацыі.

У цэнтры рэкамендавалі карыстальнікам змяніць лагіны і паролі ад акаўнтаў адпаведных інтэрнэт-рэсурсаў: realt.by, kvartirant.by, mls.realt.by, а таксама ў мабільнай праграме Realt і іншых сэрвісах і электронных рэсурсах, якія належаць аператару.

Праводзіцца праверка абставінаў інцыдэнту.