Жыхар Наваполацка жорстка забіваў жонку на вачах у маленькіх дзяцей — але ў калонію ён не адправіцца

Жыхар Наваполацка жорстка забіваў жонку на вачах у дзяцей. На яе целе налічылі 52 раны, паведамляе прэс-служба пракуратуры. Але ён наўрад ці адправіцца ў калонію — забойства ён здзейсніў у стане непрытомнасці.

Пракуратура скіравала ў Віцебскі абласны суд крымінальную справу ў дачыненні да 40-гадовага жыхара Наваполацка, які здзейсніў забойства з асаблівай жорсткасцю.

7 ліпеня гэтага года на лецішчы, на вачах у маленькіх дзяцей, ён забіў сваю жонку. На целе 39-гадовай жанчыны налічылі не менш за 52 «траўмавальныя ўздзеянні клінком нажа і іншымі вострымі прадметамі». Яна памерла там жа.

«Згодна з заключэннем стацыянарнай комплекснай судовай псіхалагічна-псіхіятрычнай экспертызы, мужчына здзейсніў злачынства ў стане непрытомнасці, мае патрэбу ў прымусовым лячэнні ў псіхіятрычным стацыянары са строгім наглядам», — паведамілі ў пракуратуры.

Суд мусіць адправіць яго на прымусовае лячэнне.